In Engels noem hulle die gedeelte in Mattheus 5 Jesus se agt ‘beatitudes’, aan ons beter bekend as Die Bergrede. Hierdie Engelse benaming is vir my ‘n vreemde woord en ek het altyd gewonder wat dit beteken. Volgens Google is ‘n sinoniem hiervoor: ‘supreme happiness’ en ‘divine joy’. Sou ‘n mens dit dan vry kon vertaal as Jesus se agt Vreugdesgeheime?
Maar die Here het soms ‘n manier om vir ons so baie te sê deur juis dit wat ongesê bly.
“Gelukkig is almal wat van God se goedheid en sorg afhanklik is.
Hulle sal definitief ’n plek kry in sy nuwe wêreld.”
As jy dink jy kan op jou eie regkom,
is hierdie die laaste wêreld waarin jy sal leef.
“Gelukkig is almal wat hartseer is oor al die pyn en swaarkry in hierdie wêreld.
God self sal hulle trane afdroog.”
As hierdie wêreld en sy mense se seer jou nie aanraak nie,
sal jy self jou trane moet afdroog wanneer die pyn na jou kant toe kom.
“Gelukkig is almal wat nie dink dat hulle belangriker as ander mense is nie.
God sal sorg dat elke stukkie grond in sy nuwe wêreld aan hulle behoort.”
As jy glo dat jy verhewe is bo ander, beter jy jou huidige rykdom geniet.
Dit het ‘n vervaldatum.
“Gelukkig is almal wat met alles in hulle daarna streef om te doen wat God vra.
Hy sal binnekort hulle verlange na Hom vir altyd wegvat.”
As jou eie pad altyd vir jou na die beste pad lyk,
sal die gat in jou hart nooit gevul word nie.
“Gelukkig is almal wat regtig vir ander mense omgee.
God sal binnekort vir hulle wys presies hoeveel Hy vir hulle omgee.”
Jou weiering om waarlik en opreg vir ander om te gee,
sal jou ‘n vreemdeling vir God maak.
“Gelukkig is almal wie se lewe van binne af nuut geword het.
God sal sorg dat hulle Hom met hul eie oë sien.”
Deur hardnekkig te bly vasklou aan jou ou mens,
verblind jy jouself vir die heerlike teenwoordigheid van God in jou lewe.
“Gelukkig is almal wat vrede maak tussen mense wat in vyandskap met mekaar leef.
God sal op die laaste dag voor almal sê dat hulle sy kinders is.”
As jy nie ‘n daadwerklike poging aanwend om vrede te bewerk nie,
sal jy op die laaste dag die een wees wat nie gekies word nie.
“Gelukkig is almal wat deur ander mense beledig en vervolg word omdat hulle doen wat God vra.
Hy sal sorg dat daar vir hulle plek is in sy nuwe wêreld.”
Jou geneigdheid om maar net by die menigte in te val, om asseblief tog net niemand te ontstel nie, sal jou ‘n plekkie van jou eie gee.
Alleen. Agtergelaat in die ou wêreld.
Ek lees vanoggend van Nabot se wingerd in 1 Konings 21. Nou toe koning Agab nie sy sin kry nie, loop ‘sulk’ hy soos ‘n propperse tienermeisie, gaan lê op sy eet-sofa – kop muur se kant toe gedraai – en weier om sy lippe aan kos te sit. Dikbek en bedinges.
Met die giftige Isebel aan sy sy, verander dinge egter vinnig. Sy kry ‘n paar manne om meineed te pleeg en te verkondig dat Nabot die Here God sou verloën het. Die dapper Nabot word skuldig bevind en met klippe doodgegooi.
‘Sulking’ stook sonde.
Ek wil my verstout om te sê dat diegene wat Jesus in Mattheus 5 as gelukkig beskou het, tien-teen-een mense was wat nie sommer ge-‘sulk’ het nie.
Koning Agab hét op die ou einde die wingerd gekry wat hy so graag wou hê, maar Elia was daar om hom te herinner watter prys dit van hom sou vra.
“Toe Elia klaar gepraat het, het Agab sy klere geskeur, ’n roukleed van sak aangetrek en begin vas.
Hy het selfs met die roukleed aan geslaap. Hy het stadig geloop.
Agab was verpletter.”
1 Konings 21:27
“Discontent is a sin that is its own punishment,
and makes men torment themselves.”
Matthew Henry
“Pleasure won by sin, is peace lost.”
Alexander MacLaren
Jou temalied vir die week: Only Jesus
Comments