DIE HERE IS MY HERDER
Met apologie aan Koning Dawid.
Die Here is my herder;
Die Een wat die ryp en die reën maak
Wat vir die branders sê: “Net tot hier…”
Dis Hy vir wie ek my paspoort finaal opgee
Die Een wat my naam gegraveer het op hemelse papier
niks sal my ontbreek nie.
Want wat het ek nodig behalwe vir Hom?
Wat is daar wat ek meer sal wil hê?
Sy nabyheid is my alles, al het ek niks
Sy woorde in my hart en my kop en my siel, as alles te veel word om te sê
Hy laat my neerlê in groen weivelde;
Hy láát my.
Hy láát my neerlê in groen weivelde
Want soms is ek te dwaas om sien die pad is ‘n wiel
En ek die hamster wat wil glo ek is een van die helde
na waters waar rus is, lei Hy my heen.
Soms is dit water vir bloed afwas
Soms is dit waters vir die dors
Maar soms laat drink Hy my diep van Homself
Laat weet Hy my ek mag maar mors
Hy verkwik my siel;
Soos vrede na lank se huil
Soos uitkoms na lank se wag
Hy weet my beursie en my lyf het dit nodig
Maar bo alles wil Hy my weer hoor lag
Hy lei my in die spore van geregtigheid, om sy Naam ontwil.
Want wanneer ek dink soos Hy sou dink
En maak soos Hy sou maak
Is dit nie meer vir my wat hulle sien nie
Hulle sien Hom dan nou in my raak
Al gaan ek ook in 'n dal van doodskaduwee, ek sal geen onheil vrees nie;
Doodskaduwee kom toegedraai in grafdoeke
van siekte en lyding en seer
Tog sal ek die donker gang nie vrees nie
Want kyk dan net wat skryf Dawid hier neer:
want U is met my: U stok en U staf dié vertroos my.
Niks van dit sal my alleen kan vang nie
U is mét my elke oomblik van elke dag
U beskerm my met die een en lei met die ander
En dit maak elke dag se juk vir my sag
U berei die tafel voor my aangesig teenoor my teëstanders;
Hulle sal nie daar Bo wees eendag nie
So dit moet my tog troos
Die tafel waar hulle U goedheid sal sien
Sal hier op aarde al wees, oop en skaamteloos bloot
U maak my hoof vet met olie; my beker loop oor.
Nes herders van ouds
Gesalf teen die vlieë en die goed wat pla
Sodat ek luidkeels kan slurp uit my piering
Onaangeraak deur dit wat die wêreld wil hê ek moet dra
Net goedheid en guns sal my volg al die dae van my lewe;
Hulle soek my en hulle vind my
waar ek dit die minste verwag
En steeds staan ek verstom oor Sy goedheid
wat my nie net raakloop nie, maar my jag
en ek sal in die huis van die Here bly in lengte van dae.
Sy huis het ‘n kamer vir my
‘n Deur met my naam in lopende skrif daarop
En eendag sal totsiens en amen nie meer nodig wees nie
Want dit sal wees waar my afdraaipaadjies stop.
Jou inspirasie vir die week: I give You my dreams
Comments